KHala ki had ko tum to par karte karte thak gae

ḳhalā kī had ko tum to paar karte karte thak ga.e

rasūl-e-pāk ek pal meñ lā-makāñ talak ga.e

tajalliyoñ meñ aap kī kuchh aisī āb-o-tāb thī

nigār-ḳhāne meñ lage sab aa.ine darak ga.e

pahāḌ jaisī zindagī kaTe to kis tarah kaTe

nibāhne kī baat thī vo do hī din meñ thak ga.e

amiir apne Tāmiyoñ ko de rahe haiñ duudh ghī

ġharīb ḳhushk roTiyoñ ke vāste bhaTak ga.e

pata nahīñ ki kyā huā thā apnī is zabān ko

ki un se guftugū meñ ham ka.ī dafa aTak ga.e

unhīñ ko mil rahe haiñ aaj tamġha-e-bahādurī

ba-vaqt-e-jang jo hamārī oT meñ dubak ga.e

KHala ki had ko tum to par karte karte thak gae

rasul-e-pak ek pal mein la-makan talak gae

tajalliyon mein aap ki kuchh aisi aab-o-tab thi

nigar-KHane mein lage sab aaine darak gae

pahaD jaisi zindagi kaTe to kis tarah kaTe

nibahne ki baat thi wo do hi din mein thak gae

amir apne Tamiyon ko de rahe hain dudh ghi

gharib KHushk roTiyon ke waste bhaTak gae

pata nahin ki kya hua tha apni is zaban ko

ki un se guftugu mein hum kai dafa aTak gae

unhin ko mil rahe hain aaj tamgha-e-bahaduri

ba-waqt-e-jang jo hamari oT mein dubak gae