خلل پذیر کہیں آسمان دیکھتا ہوں

خلل پذیر کہیں آسمان دیکھتا ہوں

کسی قبا میں زمین و زمان دیکھتا ہوں

یہ میں ہوں اور یہ میں ہوں یہ ایک میں ہی ہوں

مگر خلیج سی اک درمیان دیکھتا ہوں

کہاں کہاں نئی تعمیر کی ضرورت ہے

سو تیری آنکھوں سے اپنا جہان دیکھتا ہوں

مرا چراغ بدن نور بار ہوتا ہے

تری ہوا کو عجب مہربان دیکھتا ہوں

یہ میں یقین کی کس انتہا پہ آ پہنچا

کہ اپنے چاروں طرف بس گمان دیکھتا ہوں

یہ خواب رکھے گا بیدار مجھ کو برسوں تک

تری گلی میں میں اپنا مکان دیکھتا ہوں