KHalal-pazir kahin aasman dekhta hun

ḳhalal-pazīr kahīñ āsmān dekhtā huuñ

kisī qabā meñ zamīn-o-zamān dekhtā huuñ

ye maiñ huuñ aur ye maiñ huuñ ye ek maiñ hī huuñ

magar ḳhalīj sī ik darmiyān dekhtā huuñ

kahāñ kahāñ na.ī tā'mīr kī zarūrat hai

so terī āñkhoñ se apnā jahān dekhtā huuñ

mirā charāġh-e-badan nūr-bār hotā hai

tirī havā ko 'ajab mehrbān dekhtā huuñ

ye maiñ yaqīn kī kis intihā pe aa pohñchā

ki apne chāroñ taraf bas gumān dekhtā huuñ

ye ḳhvāb rakkhegā bedār mujh ko barsoñ tak

tirī galī meñ maiñ apnā makān dekhtā huuñ

KHalal-pazir kahin aasman dekhta hun

kisi qaba mein zamin-o-zaman dekhta hun

ye main hun aur ye main hun ye ek main hi hun

magar KHalij si ek darmiyan dekhta hun

kahan kahan nai ta'mir ki zarurat hai

so teri aankhon se apna jahan dekhta hun

mera charagh-e-badan nur-bar hota hai

teri hawa ko 'ajab mehrban dekhta hun

ye main yaqin ki kis intiha pe aa pohncha

ki apne chaaron taraf bas guman dekhta hun

ye KHwab rakkhega bedar mujh ko barson tak

teri gali mein main apna makan dekhta hun