KHalish baKHshi tapish baKHshi gudaz apna diya maine

ḳhalish baḳhshī tapish baḳhshī gudāz apnā diyā maiñ ne

mizāj-e-husn ko bhī kar diyā ġham-āshnā maiñ ne

ḳhirad ne chārasāzī kī junūñ ne rahnumā.ī kī

baḌī mushkil se paayā sāya-e-zulf-e-rasā maiñ ne

ḳhajil huuñ maiñ ki ehsās-e-farāġhat chhīn kar tum se

ġham-e-ārā.ish-e-kākul tumheñ kyoñ de diyā maiñ ne

havā.eñ tund mausam nā-muvāfiq bāġhbāñ barham

ajab aalam meñ rakkhī hai nasheman kī binā maiñ ne

ilāj-e-dard-e-dil mushkil thā lekin ho gayā āsāñ

mohabbat ko ḳhudī kā ik nayā nusḳha diyā maiñ ne

maiñ kahtā thā ki aql-o-ishq meñ rishta nahīñ mumkin

magar ab sochtā huuñ ye garebāñ kyoñ siyā maiñ ne

ḳhudā kā shukr hai 'ehsān' is daur-e-tanaffur meñ

farāham kar liye haiñ chand arbāb-e-vafā maiñ ne

KHalish baKHshi tapish baKHshi gudaz apna diya main ne

mizaj-e-husn ko bhi kar diya gham-ashna main ne

KHirad ne chaarasazi ki junun ne rahnumai ki

baDi mushkil se paya saya-e-zulf-e-rasa main ne

KHajil hun main ki ehsas-e-faraghat chhin kar tum se

gham-e-araish-e-kakul tumhein kyon de diya main ne

hawaen tund mausam na-muwafiq baghban barham

ajab aalam mein rakkhi hai nasheman ki bina main ne

ilaj-e-dard-e-dil mushkil tha lekin ho gaya aasan

mohabbat ko KHudi ka ek naya nusKHa diya main ne

main kahta tha ki aql-o-ishq mein rishta nahin mumkin

magar ab sochta hun ye gareban kyon siya main ne

KHuda ka shukr hai 'ehsan' is daur-e-tanaffur mein

faraham kar liye hain chand arbab-e-wafa main ne