KHalish ho jis mein wo arman talash karta hun

ḳhalish ho jis meñ vo armāñ talāsh kartā huuñ

na nikle dil se jo paikāñ talāsh kartā huuñ

kisī kī kākul-e-pechāñ talāsh kartā huuñ

chaman meñ sumbul-o-raihāñ talāsh kartā huuñ

na jis meñ daur-e-ḳhizāñ ho na āshiyāna jale

maiñ koī aisā gulistāñ talāsh kartā huuñ

ḳhilāf-e-vaza.a hai hadd-e-junūñ se baḌh jaanā

tarīq-e-chāk-garībāñ talāsh kartā huuñ

maiñ is talāsh ke qurbāñ fasāna-e-dil ko

maiñ roz ik nayā unvāñ talāsh kartā huuñ

na koī sham.a hai raushan na raqs-e-parvāna

sukūn-e-gor-e-ġharībāñ talāsh kartā huuñ

jo hādsāt kī āñdhī meñ bhī rahe raushan

maiñ aisī sham-e-farozāñ talāsh kartā huuñ

kabhī kalīm ne dekhā thā tuur par jalva

vahī maiñ jalva-e-jānāñ talāsh kartā huuñ

vo shah-rag se bhī nazdīk shams' rahtā hai

jise ba-koh-o-bayābāñ talāsh kartā huuñ

KHalish ho jis mein wo arman talash karta hun

na nikle dil se jo paikan talash karta hun

kisi ki kakul-e-pechan talash karta hun

chaman mein sumbul-o-raihan talash karta hun

na jis mein daur-e-KHizan ho na aashiyana jale

main koi aisa gulistan talash karta hun

KHilaf-e-waza hai hadd-e-junun se baDh jaana

tariq-e-chaak-gariban talash karta hun

main is talash ke qurban fasana-e-dil ko

main roz ek naya unwan talash karta hun

na koi shama hai raushan na raqs-e-parwana

sukun-e-gor-e-ghariban talash karta hun

jo hadsat ki aandhi mein bhi rahe raushan

main aisi sham-e-farozan talash karta hun

kabhi kalim ne dekha tha tur par jalwa

wahi main jalwa-e-jaanan talash karta hun

wo shah-rag se bhi nazdik shams' rahta hai

jise ba-koh-o-bayaban talash karta hun