KHalish sukun ka mudawa nahin to kuchh bhi nahin

ḳhalish sukūñ kā mudāvā nahīñ to kuchh bhī nahīñ

shikast-e-sāz meñ naġhma nahīñ to kuchh bhī nahīñ

jise zamāna kahe iztirāb kā aalam

vo zindagī kā sahārā nahīñ to kuchh bhī nahīñ

sarod-e-bāñg-e-mo.azzin nahīñ dalīl-e-sahar

mizha pe sub.h kā taarā nahīñ to kuchh bhī nahīñ

huā kareñ tire kaan āshnā-e-shor-e-jaras

safar kā dil meñ irāda nahīñ to kuchh bhī nahīñ

ye maanā qalb-e-zamīñ tak tirī pahuñch hai magar

talāsh-e-auj-e-surayyā nahīñ to kuchh bhī nahīñ

hamāre butkada-e-dil meñ DhūñD to zāhid

yahīñ kahīñ tirā kaaba nahīñ to kuchh bhī nahīñ

KHalish sukun ka mudawa nahin to kuchh bhi nahin

shikast-e-saz mein naghma nahin to kuchh bhi nahin

jise zamana kahe iztirab ka aalam

wo zindagi ka sahaara nahin to kuchh bhi nahin

sarod-e-bang-e-moazzin nahin dalil-e-sahar

mizha pe subh ka tara nahin to kuchh bhi nahin

hua karen tere kan aashna-e-shor-e-jaras

safar ka dil mein irada nahin to kuchh bhi nahin

ye mana qalb-e-zamin tak teri pahunch hai magar

talash-e-auj-e-surayya nahin to kuchh bhi nahin

hamare butkada-e-dil mein DhunD to zahid

yahin kahin tera kaba nahin to kuchh bhi nahin