خلوت میں جو دلدار کی وحشت نہیں کرتے

خلوت میں جو دلدار کی وحشت نہیں کرتے

وہ راہ تصوف میں کرامت نہیں کرتے

ٹھوکر میں پڑا رہتا ہے یہ عالم رنگیں

دیوانے تو مر جاتے ہیں بیعت نہیں کرتے

مقبول خدا ہونے کی چاہت میں ہم ایسے

دل کھول کے دشمن سے بھی نفرت نہیں کرتے

ہم گھر ہی فقط جائیں نہیں ایسا نہیں ہے

صحرا بھی چلے جاتے ہیں بدعت نہیں کرتے

کیا دیکھ رہا ہے تو اس انداز ہنر کو

ہم شعر و سخن باعث شہرت نہیں کرتے

نذرانے میں جو سر نہیں دے سکتے ہیں جانیؔ

وہ سلطنت عشق کی حسرت نہیں کرتے