KHamosh rah gae guftar tak nahin pahunche

ḳhamosh rah ga.e guftār tak nahīñ pahuñche

hamāre zaḳhm bhī iz.hār tak nahīñ pahuñche

gila nahīñ hai ḳhamoshī kā un hurūf kā hai

suḳhan meñ Dhal ke jo me.aar tak nahīñ pahuñche

tamām ḳhemoñ meñ jalte rahe suḳhan ke charāġh

ġharīb-ḳhāna-e-bīmār tak nahīñ pahuñche

nafī-e-ḳhāk se apnā husūl kyā paate

vo log jo kisī iqrār tak nahīñ pahuñche

ham ahl-e-ḳhvāb the apnī hadoñ meñ jiite rahe

junūn-zār ke asrār tak nahīñ pahuñche

pukārtā rahā koī ḳhudī kī manzil se

ham apne tāla-e-bedār tak nahīñ pahuñche

'tarāz' kaise suḳhan the jo imtihāñ ke liye

tilsim-e-shab ke giraftār tak nahīñ pahuñche

KHamosh rah gae guftar tak nahin pahunche

hamare zaKHm bhi izhaar tak nahin pahunche

gila nahin hai KHamoshi ka un huruf ka hai

suKHan mein Dhal ke jo mear tak nahin pahunche

tamam KHemon mein jalte rahe suKHan ke charagh

gharib-KHana-e-bimar tak nahin pahunche

nafi-e-KHak se apna husul kya pate

wo log jo kisi iqrar tak nahin pahunche

hum ahl-e-KHwab the apni hadon mein jite rahe

junun-zar ke asrar tak nahin pahunche

pukarta raha koi KHudi ki manzil se

hum apne tala-e-bedar tak nahin pahunche

'taraaz' kaise suKHan the jo imtihan ke liye

tilsim-e-shab ke giraftar tak nahin pahunche