aise chhute hain tasawwur mein tujhe hum chup-chap

aise chhūte haiñ tasavvur meñ tujhe ham chup-chāp

jaise phūloñ ko chhuā kartī hai shabnam chup-chāp

tark-e-ulfat pe bhī kar jaate haiñ aksar gumrāh

mere ḳhvāboñ ko tire gesu-e-pur-ḳham chup-chāp

jaise kartī hī nahīñ tang hameñ ye ma.asūm

kaise jaatī hai shab-e-hijr sahar-dam chup-chāp

koī miltā hī nahīñ us ko suḳhan kā mauzūa

baiThī rahtī hai mere paas shab-e-ġham chup-chāp

shorish-e-vaqt ne baḳhshī nahīñ jā-e-afsos

ya.anī karnā hī paḌā ziist kā mātam chup-chāp

mauj-e-hañgām-e-charāġhāñ hai na vo rañg-e-abīr

shoḳhī-e-īd bhī ḳhāmosh moharram chup-chāp

merī āñkheñ haiñ tire husn kī goyā tasvīr

maiñ ne dekhā hai tire husn kā aalam chup-chāp

daur-e-iblīs ke ye bāda-gusārān 'majāz'

piite rahte haiñ jahannam kā jahannam chup-chāp

aise chhute hain tasawwur mein tujhe hum chup-chap

jaise phulon ko chhua karti hai shabnam chup-chap

tark-e-ulfat pe bhi kar jate hain aksar gumrah

mere KHwabon ko tere gesu-e-pur-KHam chup-chap

jaise karti hi nahin tang hamein ye masum

kaise jati hai shab-e-hijr sahar-dam chup-chap

koi milta hi nahin us ko suKHan ka mauzua

baiThi rahti hai mere pas shab-e-gham chup-chap

shorish-e-waqt ne baKHshi nahin ja-e-afsos

yani karna hi paDa zist ka matam chup-chap

mauj-e-hangam-e-charaghan hai na wo rang-e-abir

shoKHi-e-id bhi KHamosh moharram chup-chap

meri aankhen hain tere husn ki goya taswir

main ne dekha hai tere husn ka aalam chup-chap

daur-e-iblis ke ye baada-gusaran 'majaz'

pite rahte hain jahannam ka jahannam chup-chap