siskiyan leti hui ghamgin hawao chup raho

siskiyāñ letī huī ġhamgīñ havāo chup raho

so rahe haiñ dard un ko mat jagāo chup raho

raat kā patthar na pighlegā shuāoñ ke baġhair

sub.h hone tak na bolo ham-navāo chup raho

band haiñ sab mai-kade saaqī bane haiñ mohtasib

ai garajtī gūñjtī kaalī ghatāo chup raho

tum ko hai mālūm āḳhir kaun sā mausam hai ye

fasl-e-gul aane talak ai ḳhush-navāo chup raho

soch kī dīvār se lag kar haiñ ġham baiThe hue

dil meñ bhī naġhma na koī gungunāo chup raho

chhaT ga.e hālāt ke bādal to dekhā jā.egā

vaqt se pahle añdhere meñ na jaao chup raho

dekh lenā ghar se niklegā na ham-sāya koī

ai mire yaaro mire dard-āshnāo chup raho

kyuuñ sharīk-e-ġham banāte ho kisī ko ai 'qatīl'

apnī suulī apne kāñdhe par uThāo chup raho

siskiyan leti hui ghamgin hawao chup raho

so rahe hain dard un ko mat jagao chup raho

raat ka patthar na pighlega shuaon ke baghair

subh hone tak na bolo ham-nawao chup raho

band hain sab mai-kade saqi bane hain mohtasib

ai garajti gunjti kali ghatao chup raho

tum ko hai malum aaKHir kaun sa mausam hai ye

fasl-e-gul aane talak ai KHush-nawao chup raho

soch ki diwar se lag kar hain gham baiThe hue

dil mein bhi naghma na koi gungunao chup raho

chhaT gae haalat ke baadal to dekha jaega

waqt se pahle andhere mein na jao chup raho

dekh lena ghar se niklega na ham-saya koi

ai mere yaro mere dard-ashnao chup raho

kyun sharik-e-gham banate ho kisi ko ai 'qatil'

apni suli apne kandhe par uThao chup raho