KHamoshi mein chhupe lafzon ke huliye yaad aaenge

ḳhamoshī meñ chhupe lafzoñ ke huliye yaad ā.eñge

tirī āñkhoñ ke be-āvāz lahje yaad ā.eñge

tasavvur Thokareñ khāte hue qadmoñ se uljhegā

ubhartī Dūbtī manzil ke raste yaad ā.eñge

mujhe ma.alūm hai dam toḌ degī āgahī merī

jo lamhe bhūlne ke haiñ vo lamhe yaad ā.eñge

kabhī apne akele-pan ke baare meñ jo sochoge

tumheñ TuuTe hue kuchh ḳhaas rishte yaad ā.eñge

kuchh aisā ho ki tasvīroñ meñ jal jaa.e tasavvur bhī

mohabbat yaad aa.egī to shikve yaad ā.eñge

jo terā jism chhū kar merī sāñsoñ meñ samāte the

har aahaT par vahī ḳhushbū ke jhoñke yaad ā.eñge

bhale aurāq-e-māzī chaaT jaa.e vaqt kī dīmak

jo qisse yaad aane haiñ vo qisse yaad ā.eñge

jahāñ tum se bichhaḌne kā sabab āñkheñ bhigo.eñge

vahīñ apnī mohabbat ke vasīle yaad ā.eñge

'salīm' āḳhir ga.e vaqtoñ kī qabreñ khodiye kyūñ-kar

dil-e-māsūm ko apne khilaune yaad ā.eñge

KHamoshi mein chhupe lafzon ke huliye yaad aaenge

teri aankhon ke be-awaz lahje yaad aaenge

tasawwur Thokaren khate hue qadmon se uljhega

ubharti Dubti manzil ke raste yaad aaenge

mujhe malum hai dam toD degi aagahi meri

jo lamhe bhulne ke hain wo lamhe yaad aaenge

kabhi apne akele-pan ke bare mein jo sochoge

tumhein TuTe hue kuchh KHas rishte yaad aaenge

kuchh aisa ho ki taswiron mein jal jae tasawwur bhi

mohabbat yaad aaegi to shikwe yaad aaenge

jo tera jism chhu kar meri sanson mein samate the

har aahaT par wahi KHushbu ke jhonke yaad aaenge

bhale auraq-e-mazi chaT jae waqt ki dimak

jo qisse yaad aane hain wo qisse yaad aaenge

jahan tum se bichhaDne ka sabab aankhen bhigoenge

wahin apni mohabbat ke wasile yaad aaenge

'salim' aaKHir gae waqton ki qabren khodiye kyun-kar

dil-e-masum ko apne khilaune yaad aaenge