KHamoshi un ka tarz-e-guftugu hai

ḳhamoshī un kā tarz-e-guftugū hai

yahī apnā takallum hū-ba-hū hai

zabāñ-bandī guloñ kī kyā karoge

ki ḳhushbū un kī sharh-e-ārzū hai

jise dekhā nahīñ ab tak kisī ne

vahī chehra hamāre chaar sū hai

pas-e-ā.īna hai ye aks kis kā

na jaane kaun mere rū-ba-rū hai

kiyā āñkhoñ ne jo āñkhoñ se shikva

usī kā tazkira ab kū-ba-kū hai

gire haiñ aañkh se jo chand qatre

unhī se dil hamārā bā-vazū hai

ḳhudī kyā hai yaqīñ bas ye ki maiñ huuñ

samundar dil meñ rakkhe aabjū hai

har ik ne āsmāñ apnā sajāyā

har ik is āsmāñ kī aabrū hai

jise ehsās apne husn kā ho

vahī sūraj hai vo hī māh-rū hai

kisī kī yaad ne mahkā diyā dil

har ik dhaḌkan hamārī mushkbū hai

ye saarī umr sāyoñ kā ta.āqub

tujhe kis kī 'hidāyat' justujū hai

KHamoshi un ka tarz-e-guftugu hai

yahi apna takallum hu-ba-hu hai

zaban-bandi gulon ki kya karoge

ki KHushbu un ki sharh-e-arzu hai

jise dekha nahin ab tak kisi ne

wahi chehra hamare chaar su hai

pas-e-aina hai ye aks kis ka

na jaane kaun mere ru-ba-ru hai

kiya aankhon ne jo aankhon se shikwa

usi ka tazkira ab ku-ba-ku hai

gire hain aankh se jo chand qatre

unhi se dil hamara ba-wazu hai

KHudi kya hai yaqin bas ye ki main hun

samundar dil mein rakkhe aabju hai

har ek ne aasman apna sajaya

har ek is aasman ki aabru hai

jise ehsas apne husn ka ho

wahi suraj hai wo hi mah-ru hai

kisi ki yaad ne mahka diya dil

har ek dhaDkan hamari mushkbu hai

ye sari umr sayon ka taaqub

tujhe kis ki 'hidayat' justuju hai