KHamoshiyon mein bahut se sawal laya hai

ḳhamoshiyoñ meñ bahut se savāl laayā hai

shikāyatoñ ke liye ruḳh nikāl laayā hai

ye keh ke us ne mujhe hairatoñ meñ Daal diyā

vo mere biite hue māh-o-sāl laayā hai

zarā sī der meñ sadiyoñ kā ban gayā zāmin

ye kis mizāj kā harf-e-kamāl laayā hai

ab us ke aage tumheñ hairateñ batā.ūñ bhī kyā

ḳhushī kā lamha bhī ranj-o-malāl laayā hai

mujhe patā na chalā ye ki merā mohsin bhī

varaq pe sone ke likh kar zavāl laayā hai

bisāt-e-ishq meñ 'aslam' ye kaise maat huī

kahāñ kahāñ se vo mohre nikāl laayā hai

KHamoshiyon mein bahut se sawal laya hai

shikayaton ke liye ruKH nikal laya hai

ye keh ke us ne mujhe hairaton mein Dal diya

wo mere bite hue mah-o-sal laya hai

zara si der mein sadiyon ka ban gaya zamin

ye kis mizaj ka harf-e-kamal laya hai

ab us ke aage tumhein hairaten bataun bhi kya

KHushi ka lamha bhi ranj-o-malal laya hai

mujhe pata na chala ye ki mera mohsin bhi

waraq pe sone ke likh kar zawal laya hai

bisat-e-ishq mein 'aslam' ye kaise mat hui

kahan kahan se wo mohre nikal laya hai