KHanjar ki tarah bu-e-saman tez bahut hai

ḳhanjar kī tarah bū-e-saman tez bahut hai

mausam kī havā ab ke junūñ-ḳhez bahut hai

raas aa.e to hai chhāñv bahut barg o shajar kī

haath aa.e to har shāḳh samar-rez bahut hai

logo mirī gul-kāri-e-vahshat kā sila kyā

dīvāne ko ik harf-e-dil-āvez bahut hai

mun.im kī tarah pīr-e-haram piite haiñ vo jaam

rindoñ ko bhī jis jaam se parhez bahut hai

maslūb huā koī sar-e-rāh-e-tamannā

āvāz-e-jaras pichhle pahar tez bahut hai

'majrūh' sune kaun tirī talḳh-navā.ī

guftār-e-azīzāñ shakar-āmez bahut hai

KHanjar ki tarah bu-e-saman tez bahut hai

mausam ki hawa ab ke junun-KHez bahut hai

ras aae to hai chhanw bahut barg o shajar ki

hath aae to har shaKH samar-rez bahut hai

logo meri gul-kari-e-wahshat ka sila kya

diwane ko ek harf-e-dil-awez bahut hai

munim ki tarah pir-e-haram pite hain wo jam

rindon ko bhi jis jam se parhez bahut hai

maslub hua koi sar-e-rah-e-tamanna

aawaz-e-jaras pichhle pahar tez bahut hai

'majruh' sune kaun teri talKH-nawai

guftar-e-azizan shakar-amez bahut hai