KHanjar se kuchh hai kaam na shamshir se gharaz

ḳhanjar se kuchh hai kaam na shamshīr se ġharaz

dil ko to us nigāh ke hai tiir se ġharaz

rakhte haiñ ham valī na kisī piir se ġharaz

gar hai to apne shappar-o-shappīr se ġharaz

duniyā ke log rakhte haiñ tadbīr se ġharaz

ham ko hai apne mālik-e-taqdīr se ġharaz

naqshe hazār laakh muraqqā koī dikhā.e

rakhte haiñ ham to yaar kī tasvīr se ġharaz

kis ke rafīq shahr kahāñ kā kahāñ kā ghar

hai vahshiyoñ ko ḳhāna-e-zanjīr se ġharaz

daulat ko laat maar ke baiThe haiñ ḳhaak par

kyā tere ḳhāksāroñ ko iksīr se ġharaz

Thahrā.eñ ġhair ko to ḳhatāvār kis liye

un ko to ik hai 'bazm' kī ta.azīr se ġharaz

KHanjar se kuchh hai kaam na shamshir se gharaz

dil ko to us nigah ke hai tir se gharaz

rakhte hain hum wali na kisi pir se gharaz

gar hai to apne shappar-o-shappir se gharaz

duniya ke log rakhte hain tadbir se gharaz

hum ko hai apne malik-e-taqdir se gharaz

naqshe hazar lakh muraqqa koi dikhae

rakhte hain hum to yar ki taswir se gharaz

kis ke rafiq shahr kahan ka kahan ka ghar

hai wahshiyon ko KHana-e-zanjir se gharaz

daulat ko lat mar ke baiThe hain KHak par

kya tere KHaksaron ko iksir se gharaz

Thahraen ghair ko to KHatawar kis liye

un ko to ek hai 'bazm' ki tazir se gharaz