KHarab-e-dard hue gham-parastiyon mein rahe

ḳharāb-e-dard hue ġham-parastiyoñ meñ rahe

ḳhushī kī khoj bahāna thī mastiyoñ meñ rahe

huā husūl-e-zar-e-fan baḌī kashākash se

ham ek umr ajab tañg-dastiyoñ meñ rahe

har ik se jhuk ke mile yuuñ ki sarfarāz hue

chaTān jaise ḳhamīda sī pastiyoñ meñ rahe

chubhan kī naav meñ pur kī ḳhalīj rishtoñ kī

ajab mazāq se ham ghar girhastiy.on meñ rahe

kitābeñ chehre manāzir tamām bāda-kade

batā.eñ kyā ki baḌī mai-parastiyoñ meñ rahe

masāfateñ thiiñ shab-e-fikr kin zamānoñ kī

kahāñ kahāñ ga.e ham kaisī hastiyoñ meñ rahe

ḳhulūs-e-fikr kī galiyoñ meñ ghūmte tanhā

ham apne sher kī ābād bastiyoñ meñ rahe

KHarab-e-dard hue gham-parastiyon mein rahe

KHushi ki khoj bahana thi mastiyon mein rahe

hua husul-e-zar-e-fan baDi kashakash se

hum ek umr ajab tang-dastiyon mein rahe

har ek se jhuk ke mile yun ki sarfaraaz hue

chaTan jaise KHamida si pastiyon mein rahe

chubhan ki naw mein pur ki KHalij rishton ki

ajab mazaq se hum ghar girhastiyon mein rahe

kitaben chehre manazir tamam baada-kade

bataen kya ki baDi mai-parastiyon mein rahe

masafaten thin shab-e-fikr kin zamanon ki

kahan kahan gae hum kaisi hastiyon mein rahe

KHulus-e-fikr ki galiyon mein ghumte tanha

hum apne sher ki aabaad bastiyon mein rahe