خراب حال ہیں لیکن سنبھل بھی سکتے ہیں

خراب حال ہیں لیکن سنبھل بھی سکتے ہیں

یہ حادثات کے ادوار ٹل بھی سکتے ہیں

ترے حلیف ہیں لیکن میں ان کو جانتا ہوں

یہ زر خرید اچانک بدل بھی سکتے ہیں

یہ بات کر کے وہ ہر بار ٹال دیتا ہے

کچھ احتیاط کریں آپ جل بھی سکتے ہیں

زمیں کی پیاس بجھاتے ہوئے حسیں بادل

کسی غریب کی کٹیا نگل بھی سکتے ہیں

ہمارے ضبط کے باعث رکے ہوئے آنسو

مزید درد ملا تو نکل بھی سکتے ہیں

یہ راز مجھ پہ اسے دیکھ کر کھلا عباسؔ

کہ پھول بول بھی سکتے ہیں چل بھی سکتے ہیں