KHas-o-KHashak bhi kab ke hain bhanwar se nikle

ḳhas-o-ḳhāshāk bhī kab ke haiñ bhañvar se nikle

ik hamīñ haiñ ki nahīñ narġha-e-shar se nikle

zaḳhm vo khul bhī to saktā hai silāyā hai jise

ham bhalā kab haiñ had-e-ḳhauf-o-ḳhatar se nikle

ye safar apnā kahīñ jānib-e-mahshar hī na ho

ham liye kis kā janāza haiñ ye ghar se nikle

kal jo Tapke the sar-e-kūcha-e-kotah-nazrāñ

ashk ab ke bhī vahī dīda-e-tar se nikle

aks kuchh apnā hī ā.īna-e-hālāt meñ thā

saTpaTā.e hue jab dām-e-safar se nikle

kaun kah saktā hai 'mājid' ki ba-īñ kam-nigahī

hashr kyā sā.at-e-ā.inda ke dar se nikle

KHas-o-KHashak bhi kab ke hain bhanwar se nikle

ek hamin hain ki nahin nargha-e-shar se nikle

zaKHm wo khul bhi to sakta hai silaya hai jise

hum bhala kab hain had-e-KHauf-o-KHatar se nikle

ye safar apna kahin jaanib-e-mahshar hi na ho

hum liye kis ka janaza hain ye ghar se nikle

kal jo Tapke the sar-e-kucha-e-kotah-nazran

ashk ab ke bhi wahi dida-e-tar se nikle

aks kuchh apna hi aaina-e-haalat mein tha

saTpaTae hue jab dam-e-safar se nikle

kaun kah sakta hai 'majid' ki ba-in kam-nigahi

hashr kya saat-e-ainda ke dar se nikle