KHasara-dar-KHasara kar liya jae

ḳhasāra-dar-ḳhasāra kar liyā jaa.e

junūñ ko isti.āra kar liyā jaa.e

ye nuqta bhī qarīn-e-maslahat hai

adāvat ko gavāra kar liyā jaa.e

darūn-e-dil yam-e-afsurdagī hai

koī tinkā sahārā kar liyā jaa.e

suḳhan-hā.e barā-e-guftanī se

ġhazal ko shāh-pāra kar liyā jaa.e

sar-e-āb-e-ravāñ sahrā bichhā kar

sarāboñ se kināra kar liyā jaa.e

ziyā āñkhoñ kī putlī meñ samo kar

añdhere kā nazāra kar liyā jaa.e

bhalā kyā khel hai kār-e-mohabbat

jo dānista dobāra kar liyā jaa.e

ye dil meñ hai ki saare ashk pī kar

badan ko miTTī gaarā kar kiyā jaa.e

basānī hai koī bastī ki sahrā

'alī' ab istiḳhāra kar liyā jaa.e

KHasara-dar-KHasara kar liya jae

junun ko istiara kar liya jae

ye nuqta bhi qarin-e-maslahat hai

adawat ko gawara kar liya jae

darun-e-dil yam-e-afsurdagi hai

koi tinka sahaara kar liya jae

suKHan-hae bara-e-guftani se

ghazal ko shah-para kar liya jae

sar-e-ab-e-rawan sahra bichha kar

sarabon se kinara kar liya jae

ziya aankhon ki putli mein samo kar

andhere ka nazara kar liya jae

bhala kya khel hai kar-e-mohabbat

jo danista dobara kar liya jae

ye dil mein hai ki sare ashk pi kar

badan ko miTTi gara kar kiya jae

basani hai koi basti ki sahra

'ali' ab istiKHara kar liya jae