KHat-e-shikasta mein kuchh ret par likha hua tha

ḳhat-e-shikasta meñ kuchh ret par likhā huā thā

jo maiñ ne ġhaur se dekhā to ghar likhā huā thā

kitāb-e-zīst meñ likkhā nahīñ gayā mirā naam

miTā diyā hai kisī ne agar likhā huā thā

ḳhabīs bheḌiye shahroñ meñ dandanāte the

aur un kī khaal pe lafz-e-bashar likhā huā thā

havā bhī haar ga.ī thī shajar girāte hue

tumhārā naam vahāñ is qadar likhā huā thā

makīn ḳhvāb se jaage hī the ki sahm ga.e

har ik makān kī chaukhaT pe Dar likhā huā thā

vo jis ko le ke mirī bastiyoñ pe TuuT paḌe

kisī kitāb se kuchh DhūñD kar likhā huā thā

hamāre naam kī taḳhtī pe ek din 'maz.har'

hamārā naam nahīñ thā shajar likhā huā thā

KHat-e-shikasta mein kuchh ret par likha hua tha

jo main ne ghaur se dekha to ghar likha hua tha

kitab-e-zist mein likkha nahin gaya mera nam

miTa diya hai kisi ne agar likha hua tha

KHabis bheDiye shahron mein dandanate the

aur un ki khaal pe lafz-e-bashar likha hua tha

hawa bhi haar gai thi shajar giraate hue

tumhaara nam wahan is qadar likha hua tha

makin KHwab se jage hi the ki sahm gae

har ek makan ki chaukhaT pe Dar likha hua tha

wo jis ko le ke meri bastiyon pe TuT paDe

kisi kitab se kuchh DhunD kar likha hua tha

hamare nam ki taKHti pe ek din 'mazhar'

hamara nam nahin tha shajar likha hua tha