KHata betabiyon ki qalb par bedad karte hain

ḳhatā betābiyoñ kī qalb par bedād karte haiñ

kise barbād karnā thā kise barbād karte haiñ

yahāñ din-rāt jin kī yaad meñ fariyād karte haiñ

chaman vaale bhī ai sayyād ham ko yaad karte haiñ

ilāhā shān-e-ḳhuddārī ye istiġhnā.iyāñ kab tak

tire bande butoñ ke sāmne fariyād karte haiñ

tujhe dil muft dete haiñ hamārā ye kaleja hai

ki apnā ghar luTā kar terā ghar ābād karte haiñ

adā-e-be-niyāzī chhā rahī hai saare aalam par

haram ke rahne vaale but-kade ābād karte haiñ

sarāpā paikar-e-mastī mujassam shān-e-ra.anā.ī

kisī ko dekhte haiñ aur ḳhudā ko yaad karte haiñ

chaman bhī aa.e lene ko qafas se ham na jā.eñge

rihā ye kaun hotā hai kise āzād karte haiñ

mohabbat hai unhīñ ajzā-e-majbūrī kā majmūa

bhulāte haiñ jinheñ dil se unhīñ ko yaad karte haiñ

na vo bū-e-vafā gul meñ na vo nazreñ haiñ ġhunchoñ kī

chaman ko chhoḌ kar ab bai'at-e-sayyād karte haiñ

inhīñ zarrāt-e-betābi se dil kī zindagānī hai

yahī zarrāt-e-betābi hameñ barbād karte haiñ

fareb-e-ārzū kā naam vasl-e-yār rakhā hai

vufūr-e-ġham meñ dhoke de ke dil ko shaad karte haiñ

vahī baazū vahī tāqat vahī parvāz hai ab bhī

qafas kī tīliyāñ kyā ḳhātir-e-sayyād karte haiñ

sukūt-e-dil nahīñ ḳhāmoshī-e-lab ai 'munīr' ik din

dikhā deñge ye ahl-e-zabt yuuñ fariyād karte haiñ

KHata betabiyon ki qalb par bedad karte hain

kise barbaad karna tha kise barbaad karte hain

yahan din-raat jin ki yaad mein fariyaad karte hain

chaman wale bhi ai sayyaad hum ko yaad karte hain

ilaha shan-e-KHuddari ye istighnaiyan kab tak

tere bande buton ke samne fariyaad karte hain

tujhe dil muft dete hain hamara ye kaleja hai

ki apna ghar luTa kar tera ghar aabaad karte hain

ada-e-be-niyazi chha rahi hai sare aalam par

haram ke rahne wale but-kade aabaad karte hain

sarapa paikar-e-masti mujassam shan-e-ranai

kisi ko dekhte hain aur KHuda ko yaad karte hain

chaman bhi aae lene ko qafas se hum na jaenge

riha ye kaun hota hai kise aazad karte hain

mohabbat hai unhin ajza-e-majburi ka majmua

bhulate hain jinhen dil se unhin ko yaad karte hain

na wo bu-e-wafa gul mein na wo nazren hain ghunchon ki

chaman ko chhoD kar ab bai'at-e-sayyaad karte hain

inhin zarraat-e-betabi se dil ki zindagani hai

yahi zarraat-e-betabi hamein barbaad karte hain

fareb-e-arzu ka nam wasl-e-yar rakha hai

wufur-e-gham mein dhoke de ke dil ko shad karte hain

wahi bazu wahi taqat wahi parwaz hai ab bhi

qafas ki tiliyan kya KHatir-e-sayyaad karte hain

sukut-e-dil nahin KHamoshi-e-lab ai 'munir' ek din

dikha denge ye ahl-e-zabt yun fariyaad karte hain