KHata-war-e-murawwat ho na marhun-e-karam ho ja

ḳhatā-vār-e-muravvat ho na marhūn-e-karam ho jā

masarrat sar jhukā.egī parastār-e-alam ho jā

inhī be-rabt ḳhvāboñ se koī ta.abīr niklegī

inhī uljhī huī rāhoñ pe merā ham-qadam ho jā

kisī zardār se jins-e-tabassum māñgne vaale

kisī bekas ke lāshe par sharīk-e-chashm-e-nam ho jā

kisī din in añdheroñ meñ charāġhāñ ho hī jā.egā

jalā kar dāġh-e-dil koī ziyā-e-shām-e-ġham ho jā

tujhe suljhā.egā ab inqilāb-e-vaqt kā shāna

taqāzā-e-junūñ hai gesu-e-daurāñ kā ḳham ho jā

tajassus markaz-e-taqdīr kā qaa.il nahīñ hotā

shu.ūr-e-bandagī! begāna-e-dair-o-haram ho jā

ye manzil aur gard-e-kārvāñ 'sāġhar' kahāñ apne

simaT kar rahguzār-e-vaqt par naqsh-e-qadam ho jā

KHata-war-e-murawwat ho na marhun-e-karam ho ja

masarrat sar jhukaegi parastar-e-alam ho ja

inhi be-rabt KHwabon se koi tabir niklegi

inhi uljhi hui rahon pe mera ham-qadam ho ja

kisi zardar se jins-e-tabassum mangne wale

kisi bekas ke lashe par sharik-e-chashm-e-nam ho ja

kisi din in andheron mein charaghan ho hi jaega

jala kar dagh-e-dil koi ziya-e-sham-e-gham ho ja

tujhe suljhaega ab inqilab-e-waqt ka shana

taqaza-e-junun hai gesu-e-dauran ka KHam ho ja

tajassus markaz-e-taqdir ka qail nahin hota

shuur-e-bandagi! begana-e-dair-o-haram ho ja

ye manzil aur gard-e-karwan 'saghar' kahan apne

simaT kar rahguzar-e-waqt par naqsh-e-qadam ho ja