KHataen kar ke agar ashk-bar hain hum log

ḳhatā.eñ kar ke agar ashk-bār haiñ ham log

qarīn-e-rahmat-e-parvardigār haiñ ham log

agar talab hai tumheñ DhūñD lo hameñ logo

ki is jahān meñ bā-e'tibār haiñ ham log

tumhī chaman ho tumhī rang-o-bū tum hī shabnam

hamārā kyā hai pareshāñ-ġhubār haiñ ham log

vo shāh-e-vaqt haiñ jamhūriyat ke parde meñ

ye tohmateñ haiñ ki bā-iḳhtiyār haiñ ham log

fareb-e-ālam-e-hastī se ham ko kyā nisbat

tire jahāñ meñ ġharīb-ud-dayār haiñ ham log

na kar sake ġham-e-jānāñ se ham kabhī insāf

ki mubtalā-e-ġham-e-rozgār haiñ ham log

havā ke biich abhī haiñ abhī nahīñ hoñge

jahāñ meñ misl-e-charāġh-e-mazār haiñ ham log

rumūz-e-ishq zamāna sikhā.egā 'salmān'

ġhalat ḳhayāl thā āmoz-gār haiñ ham log

KHataen kar ke agar ashk-bar hain hum log

qarin-e-rahmat-e-parwardigar hain hum log

agar talab hai tumhein DhunD lo hamein logo

ki is jahan mein ba-e'tibar hain hum log

tumhi chaman ho tumhi rang-o-bu tum hi shabnam

hamara kya hai pareshan-ghubar hain hum log

wo shah-e-waqt hain jamhuriyat ke parde mein

ye tohmaten hain ki ba-iKHtiyar hain hum log

fareb-e-alam-e-hasti se hum ko kya nisbat

tere jahan mein gharib-ud-dayar hain hum log

na kar sake gham-e-jaanan se hum kabhi insaf

ki mubtala-e-gham-e-rozgar hain hum log

hawa ke bich abhi hain abhi nahin honge

jahan mein misl-e-charagh-e-mazar hain hum log

rumuz-e-ishq zamana sikhaega 'salman'

ghalat KHayal tha aamoz-gar hain hum log