khaTak ne dil ki diya zaKHm-e-be-nishan ka pata

khaTak ne dil kī diyā zaḳhm-e-be-nishāñ kā patā

na us dahan meñ fuġhāñ thī na thā zabāñ kā patā

sar-e-niyāz jhukāne kī ḳhū to paidā kar

jabīn-e-shauq lagā legī āstāñ kā patā

sitam dabā na sakā aap ke shahīdoñ ko

jafā miTā na sakī ḳhūn-e-be-kasāñ kā patā

rag-e-burīda pukāregī naam qātil kā

kafan batā.egā us teġh-e-ḳhūñ-chakāñ kā patā

isī qadar to hai sarmāya-e-tajassus-e-aql

ki kuchh zamīñ kī ḳhabar hai kuchh āsmāñ kā patā

dil-e-tapāñ thā kahīñ chashm-e-ḳhūñfishāñ thī kahīñ

qadam qadam pe milā kūcha-e-butāñ kā patā

asīr-e-dām-e-mohabbat se pūchhiye 'betāb'

kamand turra-e-mushkīn-e-dilsitāñ kā patā

khaTak ne dil ki diya zaKHm-e-be-nishan ka pata

na us dahan mein fughan thi na tha zaban ka pata

sar-e-niyaz jhukane ki KHu to paida kar

jabin-e-shauq laga legi aastan ka pata

sitam daba na saka aap ke shahidon ko

jafa miTa na saki KHun-e-be-kasan ka pata

rag-e-burida pukaregi nam qatil ka

kafan bataega us tegh-e-KHun-chakan ka pata

isi qadar to hai sarmaya-e-tajassus-e-aql

ki kuchh zamin ki KHabar hai kuchh aasman ka pata

dil-e-tapan tha kahin chashm-e-KHunfishan thi kahin

qadam qadam pe mila kucha-e-butan ka pata

asir-e-dam-e-mohabbat se puchhiye 'betab'

kamand turra-e-mushkin-e-dilsitan ka pata