khaTkhaTata hai dar-e-dil ki bhala zanjir kaun

khaTkhaTātā hai dar-e-dil kī bhalā zanjīr kaun

de rahā hai mere ḳhvāboñ ko na.ī ta.abīr kaun

merī āñkhoñ ke havāle se mire ruḳhsār par

likh gayā kājal se apne dard kī tahrīr kaun

jis ko paane ke liye mar mar ke jiite haiñ sabhī

qabr tak le kar gayā duniyā kī vo jāgīr kaun

jab ḳhudā ne hī nahīñ likkhā use mere liye

us ko duniyā meñ banā detā mirī taqdīr kaun

vo jo kahte the mohabbat nafratoñ kā hai javāb

un laboñ par rakh gayā nafrat bujhī shamshīr kaun

ye zamīñ sabza ye paanī āsmāñ shams-o-qamar

kaun hai in kā musavvir hai pas-e-tasvīr kaun

mujh ko baḳhshā hai ḳhudā ne jab ye ġhazloñ kā hunar

mere fan kī phir ghaTā.egā bhalā tauqīr kaun

falsafa 'ġhālib' ke jaisā kaun likkhegā 'hinā'

bhar sakegā shā.irī meñ phir se rañg-e-'mīr' kaun

khaTkhaTata hai dar-e-dil ki bhala zanjir kaun

de raha hai mere KHwabon ko nai tabir kaun

meri aankhon ke hawale se mere ruKHsar par

likh gaya kajal se apne dard ki tahrir kaun

jis ko pane ke liye mar mar ke jite hain sabhi

qabr tak le kar gaya duniya ki wo jagir kaun

jab KHuda ne hi nahin likkha use mere liye

us ko duniya mein bana deta meri taqdir kaun

wo jo kahte the mohabbat nafraton ka hai jawab

un labon par rakh gaya nafrat bujhi shamshir kaun

ye zamin sabza ye pani aasman shams-o-qamar

kaun hai in ka musawwir hai pas-e-taswir kaun

mujh ko baKHsha hai KHuda ne jab ye ghazlon ka hunar

mere fan ki phir ghaTaega bhala tauqir kaun

falsafa 'ghaalib' ke jaisa kaun likkhega 'hina'

bhar sakega shairi mein phir se rang-e-'mir' kaun