KHatm har achchha bura ho jaega

ḳhatm har achchhā burā ho jā.egā

ek din sab kuchh fanā ho jā.egā

kyā patā thā dekhnā us kī taraf

hādsa itnā baḌā ho jā.egā

muddatoñ se band darvāza koī

dastakeñ dene se vā ho jā.egā

hai abhī tak us ke aane kā yaqīn

jaise koī mo.ajiza ho jā.egā

muskurā kar dekh lete ho mujhe

is tarah kyā haq adā ho jā.egā

kaash ho jaao mire ham-rāh tum

varna koī dūsrā ho jā.egā

kal kā va.ada aur is bohrān meñ?

jaane kal duniyā meñ kyā ho jā.egā

rañg lā.egā shahīdoñ kā lahū

zulm jab had se sivā ho jā.egā

aap kā kuchh bhī na jā.egā 'shu.ūr'

ham ġharīboñ kā bhalā ho jā.egā

KHatm har achchha bura ho jaega

ek din sab kuchh fana ho jaega

kya pata tha dekhna us ki taraf

hadsa itna baDa ho jaega

muddaton se band darwaza koi

dastaken dene se wa ho jaega

hai abhi tak us ke aane ka yaqin

jaise koi moajiza ho jaega

muskura kar dekh lete ho mujhe

is tarah kya haq ada ho jaega

kash ho jao mere ham-rah tum

warna koi dusra ho jaega

kal ka wada aur is bohran mein?

jaane kal duniya mein kya ho jaega

rang laega shahidon ka lahu

zulm jab had se siwa ho jaega

aap ka kuchh bhi na jaega 'shuur'

hum gharibon ka bhala ho jaega