ختم ہوگی کب یہ وحشت اے خدا کب فیصلہ ہوگا

ختم ہوگی کب یہ وحشت اے خدا کب فیصلہ ہوگا

خاک میں خلق خدا مل جائے گی تب فیصلہ ہوگا

شاخ گل کافی رعونت ہے ابھی سورج کے لہجے میں

دھوپ جب پیڑوں سے اترے گی تو پھر سب فیصلہ ہوگا

دن سوا نیزے پہ چڑھتا ہے تو چڑھنے دیں ابھی دن ہے

دن کے سینے سے گزر کر آج کی شب فیصلہ ہوگا

شہر بھر میں دیکھنا اس رات گل ہوں گے دیے سارے

جز ہوا کوئی نہیں ہوگا مرا جب فیصلہ ہوگا

اے فلک اب جس میں جتنی تاب ہے وہ آزمائے سب

اے زمیں رقص جنوں کی شرط پر اب فیصلہ ہوگا