ختم ہوتے نہیں چاہت کے شمارے اب تک

ختم ہوتے نہیں چاہت کے شمارے اب تک

تم کو پورا نہیں پڑھ پاتے تمہارے اب تک

چاند کو چھوتے نہیں ہاتھ ہمارے اب تک

اپنی قسمت میں نہیں اپنے ستارے اب تک

قبر تک آنے لگے پاؤں ہمارے لیکن

بوجھ دنیا کے نہیں سر سے اتارے اب تک

مطمئن آج بھی ہیں دل کی حسیں چوٹوں سے

اچھے لگتے ہیں محبت کے خسارے اب تک

اب فضا میں بھی دکھائی نہیں دیتے ہم کو

ڈھونڈتے رہتے ہیں رنگین غبارے اب تک

یاد میں روٹیاں تم میرے لئے سینکتی ہو

اور چولھے سے لپکتے ہیں شرارے اب تک

دور پردیس میں بیٹھے ہیں مگر آنکھوں میں

جھلملاتے ہیں تری مانگ کے تارے اب تک

تو نے آنچل کا ذرا سا بھی سہارا نہ دیا

آنکھ سے پھوٹ بہے کتنے فوارے اب تک

ساتھیو کشتی تو منجدھار تلک آ پہنچی

اور ساحل سے نہیں کوئی اشارے اب تک

آپ نے سوچا نہیں آپ ہمارے ہو جائیں

اور ہم آپ کے ہیں سارے کے سارے اب تک