KHatm hote nahin chahat ke shumare ab tak

ḳhatm hote nahīñ chāhat ke shumāre ab tak

tum ko puurā nahīñ paḌh paate tumhāre ab tak

chāñd ko chhūte nahīñ haath hamāre ab tak

apnī qismat meñ nahīñ apne sitāre ab tak

qabr tak aane lage paañv hamāre lekin

bojh duniyā ke nahīñ sar se utāre ab tak

mutma.in aaj bhī haiñ dil kī hasīñ choToñ se

achchhe lagte haiñ mohabbat ke ḳhasāre ab tak

ab fazā meñ bhī dikhā.ī nahīñ dete ham ko

DhūñDte rahte haiñ rangīn ġhubbāre ab tak

yaad meñ roTiyāñ tum mere liye señktī ho

aur chūlhe se lapakte haiñ sharāre ab tak

duur pardes meñ baiThe haiñ magar āñkhoñ meñ

jhilmilāte haiñ tirī maañg ke taare ab tak

tū ne āñchal kā zarā sā bhī sahārā na diyā

aañkh se phuuT bahe kitne favāre ab tak

sāthiyo kashtī to mañjdhār talak aa pahuñchī

aur sāhil se nahīñ koī ishāre ab tak

aap ne sochā nahīñ aap hamāre ho jaa.eñ

aur ham aap ke haiñ saare ke saare ab tak

KHatm hote nahin chahat ke shumare ab tak

tum ko pura nahin paDh pate tumhaare ab tak

chand ko chhute nahin hath hamare ab tak

apni qismat mein nahin apne sitare ab tak

qabr tak aane lage panw hamare lekin

bojh duniya ke nahin sar se utare ab tak

mutmain aaj bhi hain dil ki hasin choTon se

achchhe lagte hain mohabbat ke KHasare ab tak

ab faza mein bhi dikhai nahin dete hum ko

DhunDte rahte hain rangin ghubbare ab tak

yaad mein roTiyan tum mere liye senkti ho

aur chulhe se lapakte hain sharare ab tak

dur pardes mein baiThe hain magar aankhon mein

jhilmilate hain teri mang ke tare ab tak

tu ne aanchal ka zara sa bhi sahaara na diya

aankh se phuT bahe kitne faware ab tak

sathiyo kashti to manjdhaar talak aa pahunchi

aur sahil se nahin koi ishaare ab tak

aap ne socha nahin aap hamare ho jaen

aur hum aap ke hain sare ke sare ab tak