KHatm jis din shorish-e-ah-o-fughan ho jaegi

ḳhatm jis din shorish-e-āh-o-fuġhāñ ho jā.egī

zindagī insān par bār-e-garāñ ho jā.egī

quvvat-e-ehsās agar sarf-e-fuġhāñ ho jā.egī

naqsh-e-faryādī mirī 'umr-e-ravāñ ho jā.egī

gar yahī dīvāngī hai rahravān-e-ishq kī

manzil-e-maqsūd gard-e-kārvāñ ho jā.egī

aaj sajdoñ kī farāvānī se hotā hai gumāñ

ḳhud jabīn-e-shauq terā āstāñ ho jā.egī

jo shab-e-furqat giregī dīda-hā-e-shauq se

vo lahū kī buuñd bahr-e-be-karāñ ho jā.egī

gulsitāñ par bijliyoñ kī yūrisheñ hone to do

har kalī sehn-e-chaman kī āshiyāñ ho jā.egī

bāda-noshī meñ agar husn-e-aqīdat hai sharīk

bazm-e-sāqī sajda-gāh-e-do-jahāñ ho jā.egī

KHatm jis din shorish-e-ah-o-fughan ho jaegi

zindagi insan par bar-e-garan ho jaegi

quwwat-e-ehsas agar sarf-e-fughan ho jaegi

naqsh-e-faryaadi meri 'umr-e-rawan ho jaegi

gar yahi diwangi hai rahrawan-e-ishq ki

manzil-e-maqsud gard-e-karwan ho jaegi

aaj sajdon ki farawani se hota hai guman

KHud jabin-e-shauq tera aastan ho jaegi

jo shab-e-furqat giregi dida-ha-e-shauq se

wo lahu ki bund bahr-e-be-karan ho jaegi

gulsitan par bijliyon ki yurishen hone to do

har kali sehn-e-chaman ki aashiyan ho jaegi

baada-noshi mein agar husn-e-aqidat hai sharik

bazm-e-saqi sajda-gah-e-do-jahan ho jaegi