KHatm kar deti hai KHud hi fasla mere liye

ḳhatm kar detī hai ḳhud hī fāsla mere liye

us kī ḳhushbū le ke aatī hai havā mere liye

maiñ ne jis jis kā dukhāyā dil vo sab jaate rahe

ab nadāmat lafz kā matlab bhī kyā mere liye

koī ab bhī dil ke mandir meñ jalātā hai diye

koī to kartā hai ab bhī ratjagā mere liye

haath ke chhāloñ ne kar lī aaj phir se ḳhud-kushī

mere bachchoñ ne kahā jab kyā kiyā mere liye

apnī ulfat ke hazāroñ rang bhar dūñgā janāb

jab koī tasvīr bhejegā ḳhudā mere liye

kis liye duniyā meñ rahne aa ga.e jannat se ham

koī to ban jaa.e ab uqda-kushā mere liye

azm-e-mohkam dekh kar is zindagī kī raah meñ

manzileñ ḳhud tai kareñgī rāsta mere liye

maiñ ne chhoḌī hī nahīñ ab tak amal kī rassiyāñ

jo bhī hai achchhā hai sab us kā likhā mere liye

KHatm kar deti hai KHud hi fasla mere liye

us ki KHushbu le ke aati hai hawa mere liye

main ne jis jis ka dukhaya dil wo sab jate rahe

ab nadamat lafz ka matlab bhi kya mere liye

koi ab bhi dil ke mandir mein jalata hai diye

koi to karta hai ab bhi ratjaga mere liye

hath ke chhaalon ne kar li aaj phir se KHud-kushi

mere bachchon ne kaha jab kya kiya mere liye

apni ulfat ke hazaron rang bhar dunga janab

jab koi taswir bhejega KHuda mere liye

kis liye duniya mein rahne aa gae jannat se hum

koi to ban jae ab uqda-kusha mere liye

azm-e-mohkam dekh kar is zindagi ki rah mein

manzilen KHud tai karengi rasta mere liye

main ne chhoDi hi nahin ab tak amal ki rassiyan

jo bhi hai achchha hai sab us ka likha mere liye