ختم کر دیتی ہے خود ہی فاصلہ میرے لیے

ختم کر دیتی ہے خود ہی فاصلہ میرے لیے

اس کی خوشبو لے کے آتی ہے ہوا میرے لیے

میں نے جس جس کا دکھایا دل وہ سب جاتے رہے

اب ندامت لفظ کا مطلب بھی کیا میرے لیے

کوئی اب بھی دل کے مندر میں جلاتا ہے دیے

کوئی تو کرتا ہے اب بھی رتجگا میرے لیے

ہاتھ کے چھالوں نے کر لی آج پھر سے خودکشی

میرے بچوں نے کہا جب کیا کیا میرے لیے

اپنی الفت کے ہزاروں رنگ بھر دوں گا جناب

جب کوئی تصویر بھیجے گا خدا میرے لیے

کس لئے دنیا میں رہنے آ گئے جنت سے ہم

کوئی تو بن جائے اب عقدہ کشا میرے لیے

عزم محکم دیکھ کر اس زندگی کی راہ میں

منزلیں خود طے کریں گی راستہ میرے لیے

میں نے چھوڑی ہی نہیں اب تک عمل کی رسیاں

جو بھی ہے اچھا ہے سب اس کا لکھا میرے لیے