KHauf ban kar ye KHayal aata hai aksar mujhko

ḳhauf ban kar ye ḳhayāl aatā hai aksar mujh ko

dasht kar jā.egā ik roz samundar mujh ko

maiñ sarāpā huuñ ḳhabar-nāma-e-imroz-e-jahāñ

kal bhulā de na ye duniyā kahīñ paḌh kar mujh ko

har nafas mujh meñ taġhayyur kī havā.e larzāñ

murtasim kar na sakā koī bhī manzar mujh ko

apne sāhil pe maiñ ḳhud tishna-dahan baiThā huuñ

dekh dariyā kī tarā.ī se nikal kar mujh ko

mire saa.e meñ bhī mujh ko nahīñ rahne degā

mere hī ghar meñ rakhegā koī be-ghar mujh ko

kārgar koī bhī tadbīr na hone degā

kyā muqaddar hai ki le jā.egā dar-dar mujh ko

kaam aa.egī na bedār-nigāhī bhī 'amīr'

ḳhvāb kah jā.egā ik din mirā paikar mujh ko

KHauf ban kar ye KHayal aata hai aksar mujh ko

dasht kar jaega ek roz samundar mujh ko

main sarapa hun KHabar-nama-e-imroz-e-jahan

kal bhula de na ye duniya kahin paDh kar mujh ko

har nafas mujh mein taghayyur ki hawae larzan

murtasim kar na saka koi bhi manzar mujh ko

apne sahil pe main KHud tishna-dahan baiTha hun

dekh dariya ki tarai se nikal kar mujh ko

mere sae mein bhi mujh ko nahin rahne dega

mere hi ghar mein rakhega koi be-ghar mujh ko

kargar koi bhi tadbir na hone dega

kya muqaddar hai ki le jaega dar-dar mujh ko

kaam aaegi na bedar-nigahi bhi 'amir'

KHwab kah jaega ek din mera paikar mujh ko