KHauf ek dil mein samaya laraz uTTha kaghaz

ḳhauf ik dil meñ samāyā laraz uTThā kāġhaz

kāñpte hāthoñ se zālim ne jo moḌā kāġhaz

na to niilā na to piilā na to ujlā kāġhaz

chāhiye un ke talavvun ko tirañgā kāġhaz

safha-e-dil pe nazar aate haiñ ab daaġh hī daaġh

god Daalā kisī kambaḳht ne saarā kāġhaz

bāġhbāñ ke sitam-o-jaur jo likhte baiThe

lag gayā ram kā ram aur dasta kā dasta kāġhaz

jab bhī vo baiThte haiñ likhne ko iqrār-e-vafā

gaañv bhar meñ kahīñ miltā nahīñ purza kāġhaz

un ke hāthoñ meñ qalam-dān-e-hidāyat ab hai

jo nahīñ jānte sīdhā hai ki ulTā kāġhaz

kyā kahe un ke taḳhayyul kī diyānat koī

jaise dekhā hai kabhī baañs kā moTā kāġhaz

zulm Dhā kar bhī abhī tak hai koī be-taqsīr

roz likhne pe bhī hai saade kā saada kāġhaz

dāstāñ gesu-e-pechāñ kī jo likhne baiThe

fountain-pen meñ hamāre bahut uljhā kāġhaz

dam-e-tahrīr na zāhir ho kahīñ dil kā ġhubār

dekhiye hone na paa.e kahīñ mailā kāġhaz

bhejnā hai mujhe ik māh-jabīñ kā ḳhat-e-shauq

'shauq'-sāhab kahīñ miltā nahīñ baḌhiyā kāġhaz

KHauf ek dil mein samaya laraz uTTha kaghaz

kanpte hathon se zalim ne jo moDa kaghaz

na to nila na to pila na to ujla kaghaz

chahiye un ke talawwun ko tiranga kaghaz

safha-e-dil pe nazar aate hain ab dagh hi dagh

god Dala kisi kambaKHt ne sara kaghaz

baghban ke sitam-o-jaur jo likhte baiThe

lag gaya ram ka ram aur dasta ka dasta kaghaz

jab bhi wo baiThte hain likhne ko iqrar-e-wafa

ganw bhar mein kahin milta nahin purza kaghaz

un ke hathon mein qalam-dan-e-hidayat ab hai

jo nahin jaante sidha hai ki ulTa kaghaz

kya kahe un ke taKHayyul ki diyanat koi

jaise dekha hai kabhi bans ka moTa kaghaz

zulm Dha kar bhi abhi tak hai koi be-taqsir

roz likhne pe bhi hai sade ka sada kaghaz

dastan gesu-e-pechan ki jo likhne baiThe

fountain-pen mein hamare bahut uljha kaghaz

dam-e-tahrir na zahir ho kahin dil ka ghubar

dekhiye hone na pae kahin maila kaghaz

bhejna hai mujhe ek mah-jabin ka KHat-e-shauq

'shauq'-sahab kahin milta nahin baDhiya kaghaz