KHauf se ab yun na apne ghar ka darwaza laga

ḳhauf se ab yuuñ na apne ghar kā darvāza lagā

tez haiñ kitnī havā.eñ is kā andāza lagā

ḳhushk thā mausam magar barsī ghaTā jab yaad kī

dil kā murjhāyā huā ġhuncha tar-o-tāza lagā

raushnī sī kar ga.ī qurbat kisī ke jism kī

ruuh meñ khultā huā mashriq kā darvāza lagā

ye añdherī raat benām-o-nishāñ kar jā.egī

apne chehre par sunahrī dhuup kā ġhāza lagā

zehn par jis dam tirā ehsās ġhālib aa gayā

duur tak bikhrā huā lafzoñ kā shīrāza lagā

ham-ḳhayāl o ham-navā bhī tujh ko mil hī jā.eñge

raat ke tanhā musāfir koī āvāza lagā

KHauf se ab yun na apne ghar ka darwaza laga

tez hain kitni hawaen is ka andaza laga

KHushk tha mausam magar barsi ghaTa jab yaad ki

dil ka murjhaya hua ghuncha tar-o-taza laga

raushni si kar gai qurbat kisi ke jism ki

ruh mein khulta hua mashriq ka darwaza laga

ye andheri raat benam-o-nishan kar jaegi

apne chehre par sunahri dhup ka ghaza laga

zehn par jis dam tera ehsas ghaalib aa gaya

dur tak bikhra hua lafzon ka shiraaza laga

ham-KHayal o ham-nawa bhi tujh ko mil hi jaenge

raat ke tanha musafir koi aawaza laga