خوف اس کا اسی سے ڈرتا ہوں

خوف اس کا اسی سے ڈرتا ہوں

میں کہاں آدمی سے ڈرتا ہوں

تیرگی اب مرا مقدر ہے

اس لئے روشنی سے ڈرتا ہوں

موت برحق ہے آئے گی لیکن

تیری چارہ گری سے ڈرتا ہوں

جس کا احسان بوجھ بن جائے

بس اسی آدمی سے ڈرتا ہوں

آخرت کا نہیں خیال ذرا

دل کی اس گم رہی سے ڈرتا ہوں

جس سے آئے عمل میں کوتاہی

میں اسی آگہی سے ڈرتا ہوں

یوں ملے مجھ کو دوستی میں فریب

آج تک دوستی سے ڈرتا ہوں

میں بھی مقصودؔ دور حاضر میں

موت یا زندگی سے ڈرتا ہوں