KHauf us ka usi se Darta hun

ḳhauf us kā usī se Dartā huuñ

maiñ kahāñ aadmī se Dartā huuñ

tīrgī ab mirā muqaddar hai

is liye raushnī se Dartā huuñ

maut bar-haq hai aa.egī lekin

terī chāragarī se Dartā huuñ

jis kā ehsān bojh ban jaa.e

bas usī aadmī se Dartā huuñ

āḳhirat kā nahīñ ḳhayāl zarā

dil kī is gum-rahī se Dartā huuñ

jis se aa.e amal meñ kotāhī

maiñ usī āgahī se Dartā huuñ

yuuñ mile mujh ko dostī meñ fareb

aaj tak dostī se Dartā huuñ

maiñ bhī 'maqsūd' daur-e-hāzir meñ

maut yā zindagī se Dartā huuñ

KHauf us ka usi se Darta hun

main kahan aadmi se Darta hun

tirgi ab mera muqaddar hai

is liye raushni se Darta hun

maut bar-haq hai aaegi lekin

teri chaaragari se Darta hun

jis ka ehsan bojh ban jae

bas usi aadmi se Darta hun

aaKHirat ka nahin KHayal zara

dil ki is gum-rahi se Darta hun

jis se aae amal mein kotahi

main usi aagahi se Darta hun

yun mile mujh ko dosti mein fareb

aaj tak dosti se Darta hun

main bhi 'maqsud' daur-e-hazir mein

maut ya zindagi se Darta hun