KHayal dil ko hai us gul se aashnai ka

ḳhayāl dil ko hai us gul se āshnā.ī kā

nahīñ sabā ko hai da.avā jahāñ-rasā.ī kā

kahīñ vo kasrat-e-ushshāq se ghamanD meñ aa

Darūñ huuñ maiñ ki na da.avā kare ḳhudā.ī kā

mujhe to Dho ke thā zāhid par ik nigāh se aaj

ġhurūr kyā huā vo terī pārsā.ī kā

jahāñ meñ dil na lagāne kā leve phir koī naam

bayāñ karūñ maiñ agar terī bevafā.ī kā

na chhoḌā maar bhī khā kar guzar galī kā tirī

raqīb ko mire da.avā hai be-hayā.ī kā

nahīñ ḳhayāl meñ laate vo saltanat jam kī

ġhurūr hai jinheñ dar kī tire gadā.ī kā

jafā-e-yār se mat 'ishtiyāq' pher ke muñh

ḳhayāl kiijo kahīñ aur jubba-sā.ī kā

KHayal dil ko hai us gul se aashnai ka

nahin saba ko hai dawa jahan-rasai ka

kahin wo kasrat-e-ushshaq se ghamanD mein aa

Darun hun main ki na dawa kare KHudai ka

mujhe to Dho ke tha zahid par ek nigah se aaj

ghurur kya hua wo teri parsai ka

jahan mein dil na lagane ka lewe phir koi nam

bayan karun main agar teri bewafai ka

na chhoDa mar bhi kha kar guzar gali ka teri

raqib ko mere dawa hai be-hayai ka

nahin KHayal mein late wo saltanat jam ki

ghurur hai jinhen dar ki tere gadai ka

jafa-e-yar se mat 'ishtiyaq' pher ke munh

KHayal kijo kahin aur jubba-sai ka