KHayal ke phul khil rahe hain bahaar ke git ga raha hun

ḳhayāl ke phuul khil rahe haiñ bahār ke giit gā rahā huuñ

tire tasavvur kī sarzamīñ par na.e gulistāñ khilā rahā huuñ

maiñ saare bārbād-kun ḳhayāloñ ko dil kā mehmāñ banā rahā huuñ

ḳhirad kī mahfil ujaḌ chukī hai junūñ kī mahfil sajā rahā huuñ

udhar hai āñkhoñ meñ ik sharārat idhar hai siine meñ ik chubhan sī

nazar se vo muskurā rahe haiñ jigar se maiñ muskurā rahā huuñ

mirī musībat ye kah rahī hai ḳhudā mujhe aazmā rahā hai

mirī ibādat ye kah rahī hai ḳhudā ko maiñ aazmā rahā huuñ

ḳhudī ke māthe pe dāġh-e-sajda havas ke chehre pe tīrgī hai

maiñ ek ā.īna le ke donoñ ko duur hī se dikhā rahā huuñ

liyā na dil ne mire sahārā ubhartī maujoñ kā shorishoñ kā

maiñ apnī is kashtī-e-shikasta kā aap hī nā-ḳhudā rahā huuñ

mile na merī ġhazal meñ kyūñkar shu.ūr-e-hastī surūr-e-mastī

'jamīl' ke mai-kade se 'ehsāñ' sharāb-e-idrāk pā rahā huuñ

KHayal ke phul khil rahe hain bahaar ke git ga raha hun

tere tasawwur ki sarzamin par nae gulistan khila raha hun

main sare barbaad-kun KHayalon ko dil ka mehman bana raha hun

KHirad ki mahfil ujaD chuki hai junun ki mahfil saja raha hun

udhar hai aankhon mein ek shararat idhar hai sine mein ek chubhan si

nazar se wo muskura rahe hain jigar se main muskura raha hun

meri musibat ye kah rahi hai KHuda mujhe aazma raha hai

meri ibaadat ye kah rahi hai KHuda ko main aazma raha hun

KHudi ke mathe pe dagh-e-sajda hawas ke chehre pe tirgi hai

main ek aaina le ke donon ko dur hi se dikha raha hun

liya na dil ne mere sahaara ubharti maujon ka shorishon ka

main apni is kashti-e-shikasta ka aap hi na-KHuda raha hun

mile na meri ghazal mein kyunkar shuur-e-hasti surur-e-masti

'jamil' ke mai-kade se 'ehsan' sharab-e-idrak pa raha hun