KHayal mein ek na ek maze ki nai kahani hai aur hum hain

ḳhayāl meñ ik na ik maze kī na.ī kahānī hai aur ham haiñ

abhī tamannā hai aur dil hai abhī javānī hai aur ham haiñ

ġharīq-e-bahr-e-sitam na kyuuñ hoñ ye jāñ-fishānī hai aur ham haiñ

ki aap haiñ aap kī chhurī hai chhurī kā paanī hai aur ham haiñ

dam-e-aḳhīr us ko ab na socheñ ye sochnā chāhiye thā pahle

ma.aal kyā hogā zindagī kā jahān-e-fānī hai aur ham haiñ

ye ishq par husn kī ināyat ye husn se ishq kī irādat

hamārī hasrat hai aur tū hai tirī javānī hai aur ham haiñ

nigāh-e-ulfat bhī ho chalī kuchh sitam bhī karne lagā vo zālim

agar yahī mehrbāniyāñ haiñ to kāmrānī hai aur ham haiñ

adā ne chheḌā nazar ne taakā sitam ne luuTā ġhazab ne maarā

zabān jab se khulī hamārī yahī kahānī hai aur ham haiñ

baqā kā charchā jahān bhar meñ magar baqā se jahān ḳhālī

ḳhayāl-e-aish-e-mudām kaisā jahān-e-fānī hai aur ham haiñ

abhī se tauba abhī se taqvā abhī se kyā fikr-e-dīn-o-uqbā

na.ī umañgeñ na.ī tarañgeñ na.ī javānī hai aur ham haiñ

pahuñch pahuñch kar falak par aaheñ kareñ na anjum meñ kyuuñ izāfa

ki shaam se sub.h tak shab-e-ġham sharar-fishānī hai aur ham haiñ

kise tavaqqo na ā.eñge vo yaqīñ kise thā bulā.eñge vo

ye ḳhaas un kī hai mehrbānī ki mehrbānī hai aur ham haiñ

uThā hī deñge naqāb apnī dikhā hī deñge vo apnā jalva

nibhegī kab tak ye lan-tarānī ye lan-tarānī hai aur ham haiñ

bhare hue chashm-e-tar meñ aañsū jigar meñ bhaḌkī huī tap-e-ġham

ye aag hai aur ye hai paanī ye aag paanī hai aur ham haiñ

fuġhāñ to āḳhir fuġhāñ hī Thahrī gila to āḳhir gila hī Thahrā

muhāl hai jis meñ saañs lenī vo nā-tavānī hai aur ham haiñ

na.e shagūfe na kyuuñ khilā.eñ jo ġhuncha-o-gul ko dekh paa.eñ

bahār to hai chaman kī raanī chaman kī raanī hai aur ham haiñ

kabhī to ham haiñ yahāñ vahāñ ke kabhī tasavvur idhar udhar kā

sukūn-o-rāhat se kyā ta.alluq ki bad-gumānī hai aur ham haiñ

jatā chuke dard-e-dil ko apne jo ab jatā.eñ to kyā jatā.eñ

kahī huī bhī sunī huī bhī vahī kahānī hai aur ham haiñ

bahut se ulfat meñ aa.e tūfāñ rahā kiye 'nūh' bhī pareshāñ

magar vahī paiham āñsuoñ kī abhī ravānī hai aur ham haiñ

KHayal mein ek na ek maze ki nai kahani hai aur hum hain

abhi tamanna hai aur dil hai abhi jawani hai aur hum hain

ghariq-e-bahr-e-sitam na kyun hon ye jaan-fishani hai aur hum hain

ki aap hain aap ki chhuri hai chhuri ka pani hai aur hum hain

dam-e-aKHir us ko ab na sochen ye sochna chahiye tha pahle

maal kya hoga zindagi ka jahan-e-fani hai aur hum hain

ye ishq par husn ki inayat ye husn se ishq ki iradat

hamari hasrat hai aur tu hai teri jawani hai aur hum hain

nigah-e-ulfat bhi ho chali kuchh sitam bhi karne laga wo zalim

agar yahi mehrbaniyan hain to kaamrani hai aur hum hain

ada ne chheDa nazar ne taka sitam ne luTa ghazab ne mara

zaban jab se khuli hamari yahi kahani hai aur hum hain

baqa ka charcha jahan bhar mein magar baqa se jahan KHali

KHayal-e-aish-e-mudam kaisa jahan-e-fani hai aur hum hain

abhi se tauba abhi se taqwa abhi se kya fikr-e-din-o-uqba

nai umangen nai tarangen nai jawani hai aur hum hain

pahunch pahunch kar falak par aahen karen na anjum mein kyun izafa

ki sham se subh tak shab-e-gham sharar-fishani hai aur hum hain

kise tawaqqo na aaenge wo yaqin kise tha bulaenge wo

ye KHas un ki hai mehrbani ki mehrbani hai aur hum hain

uTha hi denge naqab apni dikha hi denge wo apna jalwa

nibhegi kab tak ye lan-tarani ye lan-tarani hai aur hum hain

bhare hue chashm-e-tar mein aansu jigar mein bhaDki hui tap-e-gham

ye aag hai aur ye hai pani ye aag pani hai aur hum hain

fughan to aaKHir fughan hi Thahri gila to aaKHir gila hi Thahra

muhaal hai jis mein sans leni wo na-tawani hai aur hum hain

nae shagufe na kyun khilaen jo ghuncha-o-gul ko dekh paen

bahaar to hai chaman ki rani chaman ki rani hai aur hum hain

kabhi to hum hain yahan wahan ke kabhi tasawwur idhar udhar ka

sukun-o-rahat se kya talluq ki bad-gumani hai aur hum hain

jata chuke dard-e-dil ko apne jo ab jataen to kya jataen

kahi hui bhi suni hui bhi wahi kahani hai aur hum hain

bahut se ulfat mein aae tufan raha kiye 'nuh' bhi pareshan

magar wahi paiham aansuon ki abhi rawani hai aur hum hain