KHayal mein tere paikar ko chum lete hain

ḳhayāl meñ tire paikar ko chuum lete haiñ

ham ahl-e-zarf haiñ patthar ko chuum lete haiñ

baḌhā ga.e the vo izzat hamāre ghar kī kabhī

is ehtirām meñ ham dar ko chuum lete haiñ

hayāt-e-nau kī jhalak jo hameñ dikhātā hai

nazar se ham usī manzar ko chuum lete haiñ

ġharīb-ḳhāne meñ hotī hai raushnī jis se

ham us charāġh-e-munavvar ko chuum lete haiñ

baḌā sukūn hameñ ghar meñ aa ke miltā hai

ham apne bachchoñ ke jab sar ko chuum lete haiñ

KHayal mein tere paikar ko chum lete hain

hum ahl-e-zarf hain patthar ko chum lete hain

baDha gae the wo izzat hamare ghar ki kabhi

is ehtiram mein hum dar ko chum lete hain

hayat-e-nau ki jhalak jo hamein dikhata hai

nazar se hum usi manzar ko chum lete hain

gharib-KHane mein hoti hai raushni jis se

hum us charagh-e-munawwar ko chum lete hain

baDa sukun hamein ghar mein aa ke milta hai

hum apne bachchon ke jab sar ko chum lete hain