KHayal nutq se begana ho to kya kahiye

ḳhayāl nutq se begāna ho to kyā kahiye

lab-e-ḳhamosh hī afsāna ho to kyā kahiye

maiñ jāntā huuñ ki tauhīn-e-vaz.a hai mastī

yahī sharī.at-e-mai-ḳhāna ho to kyā kahiye

jamāl-e-dost ko dīvāngī se kyā matlab

dil apne aap hī dīvāna ho to kyā kahiye

ho koī aur to us se gilā munāsib hai

magar jo dost hai begāna ho to kyā kahiye

baġhair sāġhar-e-mai bhī hai kaif kā imkān

tirā ḳhayāl hī rindāna ho to kyā kahiye

maiñ chāhtā huuñ kahūñ rañg-e-ishq kī rūdād

sulūk husn-e-harīfāna ho to kyā kahiye

aziiz dil se ziyāda hai mujh ko ismat-e-rāz

har ik taraf yahī afsāna ho to kyā kahiye

mazāq-e-bazm kī islāh mumkināt se hai

faroġh-e-sham.a hī parvāna ho to kyā kahiye

shabāb dāvat-e-rañgīnī-e-nazar hai 'ziyā'

magar nazar hī faqīhāna ho to kyā kahiye

KHayal nutq se begana ho to kya kahiye

lab-e-KHamosh hi afsana ho to kya kahiye

main jaanta hun ki tauhin-e-waza hai masti

yahi shariat-e-mai-KHana ho to kya kahiye

jamal-e-dost ko diwangi se kya matlab

dil apne aap hi diwana ho to kya kahiye

ho koi aur to us se gila munasib hai

magar jo dost hai begana ho to kya kahiye

baghair saghar-e-mai bhi hai kaif ka imkan

tera KHayal hi rindana ho to kya kahiye

main chahta hun kahun rang-e-ishq ki rudad

suluk husn-e-harifana ho to kya kahiye

aziz dil se ziyaada hai mujh ko ismat-e-raaz

har ek taraf yahi afsana ho to kya kahiye

mazaq-e-bazm ki islah mumkinat se hai

farogh-e-shama hi parwana ho to kya kahiye

shabab dawat-e-rangini-e-nazar hai 'ziya'

magar nazar hi faqihana ho to kya kahiye