KHayal-o-KHwab ke paikar badalte rahte hain

ḳhayāl-o-ḳhvāb ke paikar badalte rahte haiñ

dil aa.ina ho to manzar badalte rahte haiñ

hamāre haal se mat kar qayās-e-nākāmī

ki sar-phiroñ ke muqaddar badalte rahte haiñ

ulajh na jaa.e kahīñ bām-o-dar meñ rishta-e-zīst

is ehtimāl se ham ghar badalte rahte haiñ

har iltifāt hai taaza jarāhatoñ kī navīd

ki chārāgar mire nashtar badalte rahte haiñ

bhalā yaqīñ ko mayassar hai kab gumāñ se najāt

ki sāhiloñ ko samundar badalte rahte haiñ

asās-e-mehr-o-mohabbat nahīñ badaltī kabhī

agarche log barābar badalte rahte haiñ

vahī hai aaj jo kal thī sazā-e-haq-goī

sutūn-e-dār pe haañ sar badalte rahte haiñ

mire vatan kī bahut muḳhtasar sī hai tārīḳh

sitam vahī hai sitamgar badalte rahte haiñ

vahī hai jalva-e-jānāna dair ho ki haram

sharāb ek hai sāġhar badalte rahte haiñ

KHayal-o-KHwab ke paikar badalte rahte hain

dil aaina ho to manzar badalte rahte hain

hamare haal se mat kar qayas-e-nakaami

ki sar-phiron ke muqaddar badalte rahte hain

ulajh na jae kahin baam-o-dar mein rishta-e-zist

is ehtimal se hum ghar badalte rahte hain

har iltifat hai taza jarahaton ki nawid

ki chaaragar mere nashtar badalte rahte hain

bhala yaqin ko mayassar hai kab guman se najat

ki sahilon ko samundar badalte rahte hain

asas-e-mehr-o-mohabbat nahin badalti kabhi

agarche log barabar badalte rahte hain

wahi hai aaj jo kal thi saza-e-haq-goi

sutun-e-dar pe han sar badalte rahte hain

mere watan ki bahut muKHtasar si hai tariKH

sitam wahi hai sitamgar badalte rahte hain

wahi hai jalwa-e-jaanana dair ho ki haram

sharab ek hai saghar badalte rahte hain