KHayal-o-KHwab ki baaton ko dohrane se kya hoga

ḳhayāl-o-ḳhvāb kī bātoñ ko dohrāne se kyā hogā

haqīqat sāmne hai jab to afsāne se kyā hogā

ḳhirad se jo nahīñ mumkin junūñ vo kar dikhātā hai

ġhalat hai jo ye kahte haiñ ki dīvāne se kyā hogā

agar dariyā meñ rahnā hai bahānā siikh maujoñ se

ḳhas-o-ḳhāshāk kī mānind bah jaane se kyā hogā

isī ehsās se paidā huī hai fikr-e-āzādī

qafas meñ is tarah ghuT ghuT ke mar jaane se kyā hogā

shikasta-sāz se naġhme kabhī paidā nahīñ hote

tumhārī uñgliyoñ ke shauq farmāne se kyā hogā

diye āñkhoñ ke donoñ bujh ga.e jab raat bhar jal kar

to hañgām-e-sahar yuuñ be-hijāb aane se kyā hogā

atā karnā hai 'ehsāñ' bazm ko soz-e-jigar apnā

ba-rañg-e-sham.a yuuñ ḳhāmosh jal jaane se kyā hogā

KHayal-o-KHwab ki baaton ko dohrane se kya hoga

haqiqat samne hai jab to afsane se kya hoga

KHirad se jo nahin mumkin junun wo kar dikhata hai

ghalat hai jo ye kahte hain ki diwane se kya hoga

agar dariya mein rahna hai bahana sikh maujon se

KHas-o-KHashak ki manind bah jaane se kya hoga

isi ehsas se paida hui hai fikr-e-azadi

qafas mein is tarah ghuT ghuT ke mar jaane se kya hoga

shikasta-saz se naghme kabhi paida nahin hote

tumhaari ungliyon ke shauq farmane se kya hoga

diye aankhon ke donon bujh gae jab raat bhar jal kar

to hangam-e-sahar yun be-hijab aane se kya hoga

ata karna hai 'ehsan' bazm ko soz-e-jigar apna

ba-rang-e-shama yun KHamosh jal jaane se kya hoga