KHayal-o-KHwab mein duniya sada basai gai

ḳhayāl-o-ḳhvāb meñ duniyā sadā basā.ī ga.ī

isī liye to haqīqat se āshnā.ī ga.ī

tumhārī vajah se miltā thā har kisī se maiñ

rahe na tum to sabhī se vo āshnā.ī ga.ī

tavīl raat lage ab na din lage chhoTā

purāne log ga.e dāstāñ-sarā.ī ga.ī

mire badan kī hadoñ tak kiyā mujhe mahdūd

ye kis hisāb se mujh ko sazā sunā.ī ga.ī

tumhāre hijr meñ ye haal ho gayā merā

tamām raat hī āñkhoñ meñ niiñd aa.ī ga.ī

mohabbatoñ kā sila bas yahī milā 'sābir'

huī jahān meñ rusvā.ī pārsā.ī ga.ī

KHayal-o-KHwab mein duniya sada basai gai

isi liye to haqiqat se aashnai gai

tumhaari wajah se milta tha har kisi se main

rahe na tum to sabhi se wo aashnai gai

tawil raat lage ab na din lage chhoTa

purane log gae dastan-sarai gai

mere badan ki hadon tak kiya mujhe mahdud

ye kis hisab se mujh ko saza sunai gai

tumhaare hijr mein ye haal ho gaya mera

tamam raat hi aankhon mein nind aai gai

mohabbaton ka sila bas yahi mila 'sabir'

hui jahan mein ruswai parsai gai