KHayal un ka dil se bhulana paDega

ḳhayāl un kā dil se bhulānā paḌegā

davā jaan kar zahr khānā paḌegā

taḳhayyul kī had meñ nahīñ un kā maskan

abhī manziloñ duur jaanā paḌegā

jo ehsās-e-dūrī ne vahshat baḌhā dī

garebāñ se dāman milānā paḌegā

yahīñ se jabīñ-sā.iyāñ siikh lī haiñ

ki ik din tire dar pe aanā paḌegā

ri'āyat kahāñ maqtal-e-'āshiqī meñ

farishte ko bhī zaḳhm khānā paḌegā

tasavvur ko ḳhud pās-e-ġhairat hai varna

jahāñ ham bulā.eñge aanā paḌegā

hamesha mohabbat ke dā've zabānī

'iram' tujh ko bhī āzmānā paḌegā

KHayal un ka dil se bhulana paDega

dawa jaan kar zahr khana paDega

taKHayyul ki had mein nahin un ka maskan

abhi manzilon dur jaana paDega

jo ehsas-e-duri ne wahshat baDha di

gareban se daman milana paDega

yahin se jabin-saiyan sikh li hain

ki ek din tere dar pe aana paDega

ri'ayat kahan maqtal-e-'ashiqi mein

farishte ko bhi zaKHm khana paDega

tasawwur ko KHud pas-e-ghairat hai warna

jahan hum bulaenge aana paDega

hamesha mohabbat ke da'we zabani

'iram' tujh ko bhi aazmana paDega