KHayali shakl par tera guman hota to kya hota

ḳhayālī shakl par terā gumāñ hotā to kyā hotā

tasavvur mahv-e-sair-e-lā-makāñ hotā to kyā hotā

pise jaate haiñ dil raftār se aaj ek aalam ke

jo ai pīr-e-falak tū naujavāñ hotā to kyā hotā

tumhārī dostī vaj.h-e-sukūn-e-qalb-e-muztar thī

agar dushman hamārā āsmāñ hotā to kyā hotā

ḳhatā kyā kī zabāñ par mudda.ā-e-dil agar laayā

ḳhamoshī se jo iz.hār-e-bayāñ hotā to kyā hotā

vo merā dard-e-dil sun sun ke mujh par muskurāte haiñ

ḳhudā nā-karda gar maiñ be-zabāñ hotā to kyā hotā

ye maanā dostī ko mar ke sābit kar diyā ham ne

kisī ko ġham nasīb-e-dushmanāñ hotā to kyā hotā

shikasta kar chukī thī dil ko aafat nā-murādī kī

koī TuuTe makāñ meñ mehmāñ hotā to kyā hotā

na khultā hashr tak jo farq hai adnā-o-a.alā meñ

na duur itnā zamīñ se āsmāñ hotā to kyā hotā

gulistāñ meñ taḌap kar kal girī hai jis jagah bijlī

vahīñ yārab hamārā āshiyāñ hotā to kyā hotā

bachāyā shirk se 'mas.ūd' shān-e-be-niyāzī ne

agar vahdat pe kasrat kā gumāñ hotā kyā hotā

KHayali shakl par tera guman hota to kya hota

tasawwur mahw-e-sair-e-la-makan hota to kya hota

pise jate hain dil raftar se aaj ek aalam ke

jo ai pir-e-falak tu naujawan hota to kya hota

tumhaari dosti wajh-e-sukun-e-qalb-e-muztar thi

agar dushman hamara aasman hota to kya hota

KHata kya ki zaban par muddaa-e-dil agar laya

KHamoshi se jo izhaar-e-bayan hota to kya hota

wo mera dard-e-dil sun sun ke mujh par muskuraate hain

KHuda na-karda gar main be-zaban hota to kya hota

ye mana dosti ko mar ke sabit kar diya hum ne

kisi ko gham nasib-e-dushmanan hota to kya hota

shikasta kar chuki thi dil ko aafat na-muradi ki

koi TuTe makan mein mehman hota to kya hota

na khulta hashr tak jo farq hai adna-o-ala mein

na dur itna zamin se aasman hota to kya hota

gulistan mein taDap kar kal giri hai jis jagah bijli

wahin yarab hamara aashiyan hota to kya hota

bachaya shirk se 'masud' shan-e-be-niyazi ne

agar wahdat pe kasrat ka guman hota kya hota