KHayalon mein basa kar tujhko ek paikar banati hun

ḳhayāloñ meñ basā kar tujh ko ik paikar banātī huuñ

hazāroñ rang bhar ke dil-nashīñ manzar banātī huuñ

bahut rotī huuñ jab bastī kahīñ koī ujaḌtī hai

maiñ kankar aur patthar joḌ kar phir ghar banātī huuñ

shab-e-ġham kī siyāhī meñ chhalakte haiñ jo palkoñ se

maiñ qatra qatra ashkoñ se mah-o-aḳhtar banātī huuñ

ġhamoñ kī yūrisheñ sah kar tan-e-tanhā zamāne meñ

shikasta-dil ko apne dard kā ḳhūgar banātī huuñ

ubharte haiñ jo chehre zehn ke parde pe ḳhvāboñ meñ

nigāhoñ meñ chhupātī huuñ kabhī dil par banātī huuñ

bikhar ke hī na rah jaa.e kahīñ ā.īne kī sūrat

mire pahlū meñ jo dil hai use patthar banātī huuñ

ġhazal meñ aa.e jo bhī lafz dil meñ tiir sā utre

'sabā' ḳhanjar banātī huuñ na maiñ nashtar banātī huuñ

KHayalon mein basa kar tujh ko ek paikar banati hun

hazaron rang bhar ke dil-nashin manzar banati hun

bahut roti hun jab basti kahin koi ujaDti hai

main kankar aur patthar joD kar phir ghar banati hun

shab-e-gham ki siyahi mein chhalakte hain jo palkon se

main qatra qatra ashkon se mah-o-aKHtar banati hun

ghamon ki yurishen sah kar tan-e-tanha zamane mein

shikasta-dil ko apne dard ka KHugar banati hun

ubharte hain jo chehre zehn ke parde pe KHwabon mein

nigahon mein chhupati hun kabhi dil par banati hun

bikhar ke hi na rah jae kahin aaine ki surat

mere pahlu mein jo dil hai use patthar banati hun

ghazal mein aae jo bhi lafz dil mein tir sa utre

'saba' KHanjar banati hun na main nashtar banati hun