khel maujon ka KHatarnak sahi kya main is khel se Dar jaunga

khel maujoñ kā ḳhatarnāk sahī kyā maiñ is khel se Dar jā.ūñgā

phir koī lahar pukāregī phir maiñ dariyā meñ utar jā.ūñgā

ḳhūb-sūrat haiñ ye āñkheñ lekin kyā maiñ āñkhoñ meñ Thahar jā.ūñgā

ḳhvāb kī tarah se dekhā hai tumheñ ḳhvāb kī tarah bikhar jā.ūñgā

shakl ban jā.ūñgā bādal meñ kabhī purvā meñ ubhar jā.ūñgā

maiñ kisī yaad kā jhoñkā ban kar tere āñgan se guzar jā.ūñgā

ye mohabbat mujhe tāqat degī hausla degī ye himmat degī

raushnī terī nazar se le kar har añdhere se guzar jā.ūñgā

koī maqsad na koī mustaqbil koī sāthī na hai koī manzil

tum ko jaanā hai jahāñ tum jaao kyā batā.ūñ maiñ kidhar jā.ūñgā

kyuuñ nahīñ mujh ko bhī pyārā hai vatan hai magar saarī zamīñ apnā chaman

kisī āñgan meñ khilā huuñ 'vāqif' kisī dhartī pe bikhar jā.ūñgā

khel maujon ka KHatarnak sahi kya main is khel se Dar jaunga

phir koi lahar pukaregi phir main dariya mein utar jaunga

KHub-surat hain ye aankhen lekin kya main aankhon mein Thahar jaunga

KHwab ki tarah se dekha hai tumhein KHwab ki tarah bikhar jaunga

shakl ban jaunga baadal mein kabhi purwa mein ubhar jaunga

main kisi yaad ka jhonka ban kar tere aangan se guzar jaunga

ye mohabbat mujhe taqat degi hausla degi ye himmat degi

raushni teri nazar se le kar har andhere se guzar jaunga

koi maqsad na koi mustaqbil koi sathi na hai koi manzil

tum ko jaana hai jahan tum jao kya bataun main kidhar jaunga

kyun nahin mujh ko bhi pyara hai watan hai magar sari zamin apna chaman

kisi aangan mein khila hun 'waqif' kisi dharti pe bikhar jaunga