khel tamashe mein aise manzar bhi hote hain

khel tamāshe meñ aise manzar bhī hote haiñ

girtī hai dastār to us meñ sar bhī hote haiñ

shahr ujāḌeñ khel rachā ke kaTh-putlī ke saath

lashkar ke sālār tamāshā-gar bhī hote haiñ

dīvāroñ ke baasī kyā jāneñ ghar kā matlab

ghar kahlātā hai jab bām-o-dar bhī hote haiñ

palaT ke bhī aa jaatī haiñ aksar ye dhyān rahe

bātoñ meñ alfāz nahīñ patthar bhī hote haiñ

ba.az auqāt to ishq bhī pahlā kaam nahīñ rahtā

ba.az auqāt masā.il kuchh dīgar bhī hote haiñ

aaj kured ke dekhūñgā yādoñ kī ThanDī raakh

chand dahakte lamhe to andar bhī hote haiñ

bikhrī bikhrī sochoñ meñ kuchh gard uḌāte pal

lā-mutanāhī se ġham kā mehvar bhī hote haiñ

jal uTThe ye ḳhas-ḳhāna to āñkhoñ se chhalkeñ

dil meñ aise barfīle paikar bhī hote haiñ

khel tamashe mein aise manzar bhi hote hain

girti hai dastar to us mein sar bhi hote hain

shahr ujaDen khel racha ke kaTh-putli ke sath

lashkar ke salar tamasha-gar bhi hote hain

diwaron ke basi kya jaanen ghar ka matlab

ghar kahlata hai jab baam-o-dar bhi hote hain

palaT ke bhi aa jati hain aksar ye dhyan rahe

baaton mein alfaz nahin patthar bhi hote hain

baz auqat to ishq bhi pahla kaam nahin rahta

baz auqat masail kuchh digar bhi hote hain

aaj kured ke dekhunga yaadon ki ThanDi rakh

chand dahakte lamhe to andar bhi hote hain

bikhri bikhri sochon mein kuchh gard uDate pal

la-mutanahi se gham ka mehwar bhi hote hain

jal uTThe ye KHas-KHana to aankhon se chhalken

dil mein aise barfile paikar bhi hote hain